ރަމަޟާންމަހުގެ ރޯދަ ދެނެގަތުން
ރަމަޟާންމަހުގެ ރޯދަ ޢަރަބި ބަހުގައި ރޯދައަށް ކިޔަނީ الصَّوْمُ އެވެ. އޭގެ މާނައަކީ ކަމަކުން މަނާވެގަތުމެވެ. ޢިލްމުވެރިންގެ އިޞްތިލާހުގައި ރޯދައަކީ: ޚާއްޞަ ނިޔަތަކާއެކު، ފަޖުރުލީއްސުރެ އިރުއޮއްސިއްޖައުމަށް ދާންދެން ކެއުންބުއިންފަދަ، ރޯދަގެއްލޭ އެންމެހާ ކަންކަމުން ދުރެހެލިވެގެން ހުރުމެވެ. މިއީ ﷲ އަށްޓަކައި އަދާކުރެވޭ ވަރަށް މަތިވެރި އަޅުކަމެކެވެ. ރަމަޟާންމަހުގެ ރޯދައިގެ ޙުކުމް ރަމަޟާންމަހުގައި ރޯދަހިފުމަކީ އިސްލާމްކަމުގެ ރުކުންތަކުގެ ތެރެއިން ރުކުނެކެވެ. އެހެންކަމުން އެ މަހުގައި ރޯދަހިފުމަކީ ކޮންމެ މުސްލިމެއްގެ މައްޗަށްވާ ޢައިނިއްޔަ ފަރުޟެކެވެ. …
