ފަލަސްޠީނުގެ ޣައްޒާގައި އަޅުގަނޑުމެންގެ ލޮބުވެތި އަޚުންނާއި އުޚުތުންނާއި ތުއްތު ކުދީން ޤަތުލު ކުރަމުންދާއިރު މުސްލިމަކަށްވީތީ ތިމާއަށް ކޮށްދެވޭނީ ކޮން ކަމެއްތޯ ބައެއް ފަރާތްތަކުން ސުވާލު ކުރެއެވެ. “ހަމައެކަނި ދުޢާ ކޮށްލީމާ ފުދޭނެ ހެއްޔެވެ؟ ނުވަތަ ހިނގާލުމެއް، އެއްވުމެއް ބޭއްވުމުން ނިމުނީ ހެއްޔެވެ؟” މިއީ ވަރަށް ގިނަ ބައެއްގެ ހިތްތަކުގައި އުފެދިފައިވާ ޝުޢޫރު ތަކެކެވެ.
ފަލަސްޠީނަށްޓަކައި ދުނިޔޭގެ އެކި ކަންކޮޅުތަކުގައި ތިބި އެންމެހާ މުސްލިމުން އެމީހަކަށް ވެވެން އޮތް ގޮތަކުން، ކުރެވެންހުރި ހުރިހާ ކަމެއް ކުރަޖެހޭނެއެވެ. އޭގެތެރެއިން އެންމެ ފުރަތަމަ ކަމަކީ ދުޢާ ކުރުމެވެ. ދުޢާކީ މުމިނުންގެ ހަތިޔާރެވެ. ދުޢާއަކީ މާތް ﷲ ގެ ޤަދަރުގައި ލިޔެވިފިއިވާ ކަންތައްތައް ބަދަލުކުރެއްވުމުގެ ސަބަބެކެވެ.
މާތް ﷲ ވަނީ ދުޢާކުރުމަށް އަމުރުކުރައްވާފައެވެ. އަދި އިޖާބަ ދެއްވާނޭކަމުގައި ވަޢުދުވެ ވޮޑިގެންފައެވެ.
އެއިލާޙު ވަޙީކުރައްވާފައިވެއެވެ.
﴿وَقَالَ رَبُّكُمُ ادْعُونِي أَسْتَجِبْ لَكُمْ إِنَّ الَّذِينَ يَسْتَكْبِرُونَ عَنْ عِبَادَتِي سَيَدْخُلُونَ جَهَنَّمَ دَاخِرِينَ﴾ (غافر 60) މާނައީ: “އަދި ތިޔަބައިމީހުންގެ ވެރިރަސްކަލާނގެ ވަޙީކުރެއްވިއެވެ. ތިޔަބައިމީހުން ތިމަންރަސްކަލާނގެއަށް دعاءކުރާށެވެ! ތިމަންރަސްކަލާނގެ ތިޔަބައިމީހުންގެ ދުޢާ އިޖާބަކުރައްވާހުށީމެވެ. ހަމަކަށަވަރުން، ތިމަންރަސްކަލާނގެއަށް (ދުޢާކޮށް) އަޅުކަން ކުރުމަށް ކިބުރުވެރިވެގަންނަ މީހުން (ދަންނާށެވެ!) ނިކަންހުރެ ނިކަމެތިވެގެންވާ ޙާލު، އެއުރެން ނަރަކަޔަށް ވަންނާނެތެވެ.”
ދުޢާކުރުމަކީ އާދައިގެ ނިކަމެތިކަމެއް ކަމުގައި ނުދެކޭށެވެ. އިސްވެދިޔަ ޖީލުތަކުގެ އިސްލާމީ އަބުޠާލުންގެ ތެރެއިން މުޖާހިދުންނަކީ ދުވާލުގެ ވަގުތުތަކުގައި ހަނގުރާމައިގެ މައިދާނުގައި ވަރުގަދަ ހަނގުރާމަވެރީންނެވެ. އަދި ރޭވުމުން އެބައިމީހުންގެ ފޭލިގެ ތަކަށް ދިޔުމަށްފަހުގެ، އެ މީހުންނަކީ އަޅުވެރީންނެވެ. ޤުރްއާން ކިޔެވުމާއި، ރޭ އަޅުކަންކުރުމުގައި މުޅި ރޭގަނޑުގެ ވާގުތުތައް އެބައިމީހުން ހޭދަކޮށްލައެވެ.
ކީރިތި ރަސޫލާ صلى الله عليه وسلم ގެ އެންމެ ދަތި އުނދާގޫ ހާލަތްތަކުގައި ދުޢާ ކުރުމަށް އަވަސްވެވަޑައިގަންނަވައެވެ. ބަދުރު ހަނގުރާމައިގެ ދުވަހުގައި މުޝްރިކުންގެ ލަޝްކަރުގައި އެއްހާސް ހަނގުރާމަވެރިން ތިއްބިތަން ދެކެވަޑައިގެން މުސްލިމުންގެ ލަޝްކަރުގައި ތިބީ ތިން ސަތޭކަ ނަވާރަ ބޭކަލުންކަމުގައިވީތި، ނުހަނު ކަންބޮޑުވެ ވަޑައިގެން ދެއަތްޕުޅު އުފުއްލަވައި ދުޢާކުރުމުގައި ދެމިހުންނެވިއެވެ.
އެކަލޭގެފާނުގެ ދުޢާފުޅުގައި ރިވާވެގެންވެއެވެ.
«اللهُمَّ أَنْجِزْ لِي مَا وَعَدْتَنِي، اللهُمَّ آتِ مَا وَعَدْتَنِي، اللهُمَّ إِنْ تُهْلِكْ هَذِهِ الْعِصَابَةَ مِنْ أَهْلِ الْإِسْلَامِ لَا تُعْبَدْ فِي الْأَرْضِ» رواه مسلم
މާނައީ: “ޔާ ﷲ! އިބަ އިލާހު މިއަޅާއަށްކުރެއްވި ވަޢުދު ތަންފީޒު ކޮށްދެއްވާނދޭވެ! ޔާ ﷲ! މިއާޅާއަށް ވަޢުދުކުރެއްވި ކަންތައް ދެއްވާނދޭވެ! ޔާ ﷲ! އިސްލާމުންގެ މި ޖަމާޢަތް (އެބަހީ: ބަނދުރު ހަނގުރާމައިގައި ބައިވެރިވެވަޑައިގަތުމަށް ވަޑައިގެން ތިއްބެވި ޞަހާބީން) ނެތިގެން ހިނގައްޖެނަމަ މި ބިމުގައި (އިބަ އިލާހަށް) ދެން އަޅުކަން ނުކުރެވޭނެއެވެ.”
އިތުރު އެކަލޭގެފާނުގެ ދެއަތްޕުޅު ދައްމަވައި އުފުއްލަވައި، ދުޢާކުރެއްވުމުގައި ކެނޑިނޭޅި ތަކުރާރު ކުރެއްވުމުގައި ހުންނެވިއެވެ. އެކަލޭގެފާނުގެ އަތްޕުޅު މައްޗަށް އުފުއްލެވިލެ މަތިކަމުން، ކޮނޑުފުޅުގައި އޮތް ރިދާކޮޅު ވެއްޓުނެވެ. އެހައިވެސް ބޮޑަށް ދުޢާކުރެއްވުމުގައި ދެމިހުންނެވިއެވެ.
ތިބާ ފަލިސްތީނަށް ނަޞްރު ދެއްވުމަށް އެދި ދުޢާ ކުރާހިނދު، ދުޢާގެ އަދަބުތަކުގައި ހިފަންވާނެއެވެ. އެގޮތުން، ދުޢާ އިޖާބަކުރެއްވުމުގެ މުހިންމު އެއް ސަބަބެއްކަމުގައި ލައްވާފައިވަނީ ދުޢާ ކުރާ މީހާ ކައިބޮއިހަދާ ތަކެއްޗާއި، އުނުއޮރިޔާ ނިވާކުރަން އަޅާ ފޭރަމަކީ ޙަލާލު ރަނގަޅު ތަކެތިކަމުގައި ވުމެވެ.
ތިބާ ފަލަސްޠީނުގެ މުސްލިމުންތަކުންނަށް ނަޞްރު ދެއްވުން އެދި ދުޢާ ކުރާއިރު، ތިބާއަކީ މާތް ﷲ ނަހީކުރެއްވި އެންމެހައި ކަމަކުން ދުރުހެލިވެ، ޙަލާލު ރިޒުޤުން ކައިބޮއެ އުޅޭ މީހެއްކަމުގައި ވާންޖެހޭނެއެވެ.
ފަލަސްޠީނަށް ނަޞްރު ދިނުމުގެ ގޮތުން ކުރެވިދާނެ އަނެއްކަމަކީ، ދިވެހިރާއްޖެއާއި އިޒްރޭލާ ދެމެދުގައި އެއްވެސް ބާވަތެއްގެ ގުޅުމެއް ނުބޭއްވުމަށް އަޑު އުފުލުމެވެ. ސޯޝަލް މީޑިޔާގަ އާއި އެނޫން ގޮތް ގޮތުންވެސް، އިޒްރޭލާ ދެކޮޅުކަން ހާމަކުރުމެވެ. އިޒްރޭލްގެ އުފެއްދުންތަކާއި، ވިޔަފާރި މުދާ ބޭނުންކުރުން ހުއްޓާލުމެވެ. އިޒްރޭލްގެ ޕާސްޕޯޓުގައި ދިވެހިރާއްޖެއަށް އެއްވެސް މީހަކު އެތެރެވުމަކީ ތިބާ ނުރުހޭކަމެއްކަށް ހާމަކުރުމެވެ.
ފަލަސްޠީނަށްޓަކައި ކުރެވިދާނޭ މުހިންމު ކަންތައްތަކުގެ ތެރޭގައި، އަޅުގަނޑުމެންގެ ޅަ ދަރީންނަށް ފަލަސްޠީނަކީ ކޮބައިކަން ބުނެދީ، މަސްޖިދުލް އަޤްޞާގެ މާތްކަން ކިޔައިދެވިދާނެއެވެ. އެ މާތް ބިމަކީ ﷲގެ ޚަލީލު އިބްރާހީމްގެފާނުން ފެށިގެން ގިނަގުނަ ނަބިއްޔުންނާއި ރަސޫލުން ފޮނުއްވުނު ބިމެކަން އެކުދިންނަށް އަނގައިދިނުމެވެ. އަދި ފަލަސްޠީނުގެ ބިމުގައި މިހިނގާ އަނިޔާވެރި ޤަތުލު ޢާއްމުގެ ޙަޤީޤަތަކީ ކޮބައިކަން އެކުދިންގެ ޢުމާރާ ގުޅޭ ގޮތަށް ކިޔައި ދިނުމެވެ.
ފަލަސްޠީނުގެ އަސްލު ވަޒަންވެރީންނަކީ ކޮބައިކަން ކިޔައިދިނުމެވެ. މަސްޖިދުލް އަޤްޞާގެ ތާރީޚު އެކުދިންނަށް އުންގަނައި ދިނުމެވެ. މިކަމަށްޓަކައި ތިބާއަކީ އެމާތް ބިމުގެ ތާރީޚު އެނގޭ މީހެއްކަމުގައިވުން މުހިންމެވެ. އެހެނީ، ފަލަސްޠީނުގެ ބިމަށް ގަދަބާރުން ވެރިވެގަނެފައިވާ ޔަހޫދީންގެ އެންމެ ބޮޑު އެއް މަސައްކަތަކީ، އެމީހުންގެ ފަސްބައި ރީތިކުރުމެވެ. މިކަމަށްޓަކައި އެބައިމީހުން ތާރީޚު އޮޅުވާލައި ދޮގުވާހަކަތައް ފަތުރައެވެ. މިއަދުވެސް އިޒްރޭލަށް ތާއީދުކުރާ ޤައުމުތަކުން ކުރާ އެންމެ ބޮޑު މަސައްކަތަކީ، ފަލަސްޠީނާއި މުސްލިމުންނާ ގުޅޭ ގޮތުން މީޑީޔާތަކުގައި ދޮގު ވާހަކަތައް ފެތުރުމެވެ.