ސަލަފް ރިޙްލާ 2024 ފުވައްމުލައްސިޓީގައި ބޭއްވުމަށްޓަކައި ޖަމްޢިއްޔަތުއްސަލަފުން އަންނަނީ ތައްޔާރީތައް ވަމުންނެވެ.
މި ޙަރަކާތް ބޭއްވުމަށް ހަމަޖައްސާފައިވަނީ ނޮވެމްބަރު 7 އިން 11 އަށެވެ. ފުވައްމުލައްސިޓީއަކީ ދީނީގޮތުންނާއި، އިޖްތިމާޢީގޮތުންނާއި، ދުޅަހެޔޮކަމާއި، ހުނަރުތަކުގެ ގޮތުން ކުރިއަރާފައިވާ ސިޓީއަކަށް ހެދުމަށްޓަކައި، މި ރިޙްލާގައި މިކަންކަމާގުޅޭ ތަފާތު އެތައް ޙަރަކާތްތަކެއް ކުރިއަށް ގެންދިޔުމަށް ވަނީ ހަމަޖައްސާފައެވެ. މީގެ ތެރޭގައި؛ ސްކޫލުތަކުގެ މުދައްރިސުންނަށާއި، ދަރިވަރުންނަށާއި، ބެލެނިވެރިންނަށް ޚާއްޞަ ވޯކްޝޮޕްތަކާއި، ކުޅިވަރު އެކަޑެމީތަކަށް ޚާއްޞަކޮށްގެން ކުރިއަށް ގެންދާ ޙަރަކާތްތަކާއި، ޢާއްމުންނަށް ހުޅުވާލެވިގެން ކުރިއަށް ގެންދާ ޙަރަކާތްތައް ހިމެނެއެވެ. މި އަހަރުގެ މި ރިޙްލާ ޕްރޮގްރާމްގައި 14ޝެއިޚުންނާއި، 3 ޑޮކްޓަރުންގެ އިތުރުން 7 ފެސިލިޓޭޓަރުން ބައިވެރިވާނެއެވެ.
ޢާއިލީގުޅުން ބަދަހިކުރުމަށްޓަކައި “ބަދަހި ޢާއިލާ”، އަންހެން ކަނބަލުންނަށް ޚާއްޞަ “ކަމަނަ ވޯކްޝޮޕް”، ޤުރްއާން ކިޔެވުމަށް އަހުލުވެރިކުރުމުގެގޮތުން “ތިލާވާ ވޯކްޝޮޕް”، އިސްލާމިކް ފައިނޭންސަށް ޚާއްޞަކޮށް “ދީނާރު ވޯކްޝޮޕް”، އަދި ދަނޑުވެރިކަމާބެހޭ ޢިލްމާއި ތަމްރީނުދިނުމަށްޓަކައި “ގްރީން ފިންގާރސް ވޯކްޝޮޕް” އަކީ މި ފަހަރުގެ ރިޙްލާގައި ހިންގުމަށް ހަމަޖެހިފައިވާ ވޯކްޝޮޕްތަކެވެ. މީގެ އިތުރުން؛ ޒަމާނީ ޓްކްނޮލޮޖީގެ ޢިލްމުތަކަށް ޚާއްޞަކޮށްގެން ކޯޑްކުރުމާއި، އޭއައި ބޭނުންކުރުމާއި، ގްރެފިކް ޑިޒައިންނަށް ހޭލުންތެރިކުރުމުގެ ޚާއްޞަ ސެޝަންތަކެއްވެސް ކުރިއަށް ގެންދިޔުމަށް ވަނީ ހަމަޖެހިފައެވެ. އަދި ފުވައްމުލައް ސިޓީ ހޮސްޕިޓަލާގުޅިގެން ކުޑަކުދިންނާގުޅޭ ބަލިތަކާއި، ކިޑުނީގެ ބަލިތަކާއި، ހަމުގެ ބަލިތަކާގުޅޭ ޑޮކްޓަރުންނަށް ހިލޭ ދެއްކޭނެއެވެ.
މި އަހަރުގެ މި ރިޙްލާ ކުރިއަށް ގެންދެވެނީ ފުވައްމުލަކު ސިޓީ ކައުންސިލާ ގުޅިގެންނެވެ. މިކަމުގައި ޒުވާނުން ބާރުވެރިކުރުމާއި، މަޢުލޫމާތާއި ފަންނާ ބެހޭ ވުޒާރާއާއި، އިސްލާމީ ކަންތައްތަކާ ބެހޭ ވުޒާރާއާއި، ފުވައްމުލަކުގެ ސްކޫލުތަކާއި، ފުވައްމުލަކު އެކި މުއައްސަސާތަކާއި، އެމްޓީސީސީއާއި، މިޓް ކޮލެޖާއި، ދާރިސް ޓީވީގެ އެހީތެރިކަން ލިބިފައިވެއެވެ. އަދި މި ޙަރަކާތުގައި ބައިވެރިވާ ފަރާތްތަކުގެ މެދުގައި ނެގޭ ގުރުއަތުން ހޮވޭ ބައިވެރިޔަކަށް އެލިޔާ އިންވެސްޓްމެންޓްސް އިން ވަނީ ސައިކަލެއް ހަދިޔާކޮށްފައެވެ. އަދި ނަވާ ޙައްޖު ޢުމުރާ ގްރޫޕުންނާއި، ނިމްސާ ލިލްޙައްޖި ވަލްޢުމްރާ ގްރޫޕުން ވަނީ ގުރުއަތުން ހޮވޭ ބައިވެރިންނަށް ޢުމުރާގެ ދަތުރުތައް ހަދިޔާކޮށްފައެވެ.
ޖަމްޢިއްޔަތުސަލަފުގެ “ރިޙްލާ” ޕްރޮގްރާމަކީ ދިވެހިރާއްޖޭގެ ރައްޔިތުން ހޭލުންތެރިކޮށް، ދީނީ އަދި ފަންނީ ހުނަރުތަކަށް އަހުލުވެރިކޮށްދީ ތަހުޒީބުކުރުމުގެ ގޮތުން ގިނަ ޙަރަކާތްތަކެއް އެކުލެވޭނޭގޮތުން އަތޮޅު ފެންވަރުގައި ރާވައި އިންތިޒާމުކުރާ އިޖްތިމާޢީ ރިޙްލާއެކެވެ. މި އަހަރުގެ މި ރިޙްލާއަކީ މިގޮތުން ހިންގޭ 8 ވަނަ އިޙްލާއެވެ. މީގެ ކުރިން ޅ. ނައިފަރާއި، ތ، ދ، ށ، ނ، ފ، އަދި ރ އަތޮޅުގައި މި ޕްރޮގްރާމް ހިންގިފައިވެއެވެ.