الحمد لله والصلاة والسلام على رسول الله وعلى آله وصحبه أجمعين.
ރެއާއި ދުވާލު އަދި ސިއްރާއި ފާޅުގައި ފާފަތަކުގައި ޣަރަޤުވަމުން ދިޔުމަކީ ބައެއް މީހުންގެ އާދައަކަށްވަނީ ވެފައެވެ. އެފަދަ މީހެއްގެ ގާތުގައި ފާފައެއް ކޮށްލުމަކީ މާބޮޑުކަމަކަށް ނުވެއެވެ. އަދި ކަމެއްކުރުމުގެ ކުރިން އެކަމުގެ ޙަރާމް ޙަލާލެއް ބެލުމަކީވެސް މާ މުހިންމުކަމަކަށް ނުވެއެވެ. ފާފަކުރުން ގިނަވެ، އުރެދުންތަކުގައި ހައްދުފަހަނަ އަޅައި ދިޔުމުން، އިސްވެދިޔަ އެތައް އުންމަތެއް ހަލާކާ ކުރިމަތިލާން ޖެހުނުކަން އެފަދަ މީހުންނަށް ނޭނގެނީ ހެއްޔެވެ؟ އަދި ކުޅިވަރާއި މަޖަލުގެ މަސްތުގައި ގިނަވަގުތު ހޭދަކުރަނިކޮށް ހަލާކުވެގެން ދިޔައީ ކިތައް ކިތައް މީހުންކަންވެސް އެފަދަ މީހުން ނުދަންނަނީ ހެއްޔެވެ؟
އަޅުގަނޑުމެންގެ ހިތުގައި އަބަދުވެސް ބަހައްޓަން ޖެހޭ މުހިންމު ދެ ކަމެއްވެއެވެ. އެއީ ﷲ ތަޢާލާއީ އެއިލާހަށް ކިޔަމަންގަންނަ އަޅުތަކުންނަށް، ގިނަގިނައިން ފާފަފުއްސަވާ ރަޙީމުވަންތަ އިލާހެވެ. އަދި ހަމައެއާއެކު އެއިލާހަށް އުރެދޭ އަޅުތަކުންނަށް، އެއިލާހުގެ ޢަޛާބު ގަދަފަދައެވެ.
އެއިލާހު ވަޙީކުރެއްވިއެވެ.
نَبِّئْ عِبَادِي أَنِّي أَنَا الْغَفُورُ الرَّحِيمُ ﴿٤٩﴾ وَأَنَّ عَذَابِي هُوَ الْعَذَابُ الْأَلِيمُ ﴿٥٠﴾ [سورة الحجر]
މާނައީ: “ހަމަކަށަވަރުން ތިމަން އިލާހީ ގިނަގިނައިން ފާފަފުއްސަވާ ރަޙީމުވަންތަ އިލާހުކަމަށާ އަދި ހަމަކަށަވަރުން ތިމަންއިލާހުގެ ޢަޛާބަކީ އެއީ ވޭންދެނިވި ޢަޛާބެއްކަން، ތިމަންއިލާހުގެ އަޅުތަކުންނަށް ކަލޭގެފާނު ޚަބަރު ދެއްވާށެވެ.”
ފަހެ، ބުއްދިވެރިންނަކީ ފާފަތަކާއި އެކަމަށް ހުރި އެންމެހާ މަގުތަކާ ދުރުހެލިވެ، ރައްކާތެރިވާ މީހުންނެވެ. އަދި ﷲ ތަޢާލާއަށް ބިރުވެތިވެ، އެއިލާހުގެ ކޯފާއަށް ރައްކާތެރިވާ މީހުންނެވެ. އަދި ފާފައެއް ކުރެވިއްޖެނަމަ އެކަމަށް ހިތާމަކޮށް، އެކަމުން ސަލާމަތްވާން މަސައްކަތްކުރާ މީހުންނެވެ. ތައުބާވުމަށް އަވަސްވެގަންނަ މީހުންނެވެ. އެއީ ކާމިޔާބާއި ފަލާހު ލިބެނިވި މީހުންނެވެ.
ފާފަތަކުގެ ސަބަބުން އަޅާއަށް ވަރަށް ގިނަ ގެއްލުންތައްކުރެއެވެ. އޭގެ ތެރެއިން ބައެއް ކަންތައްތައް އިބްނުލްޤައްޔިމް رحمه الله ވަނީ “އައްދާއު ވައްދަވާއު” އަދި “އަލްފަވާއިދު” ގައި ބަޔާންކުރައްވާފައެވެ. އެކަންތައްތަކުގެ ތެރޭގައި: “ޢިލްމުން މަޙްރޫމުވުމާއި ހިތުގެ އެކަނިވެރިކަމާއި ކަންކަން ދަތިވުމާއި ހަށިގަނޑު ބަލިކަށިވުމާއި ކިޔަމަންތެރިކަން އަދާކުރުމުން މަޙްރޫމުވުމާއި ބަރަކާތް ކެނޑުމާއި ތައުފީޤުން މަޙްރޫމުވުމާއި މޭގެ ނުތަނަވަސްކަމާއި ނުބައި ކަންތައްތައް އާލާވުމާއި ފާފަކުރުމަށް އާދަވުމާއި ﷲގެ ޙަޟްރަތުގައި ނިކަމެތިވުމާއި މީސްތަކުންގެ ކުރިމަތީގައި އޭނާގެ އަގެއް ނެތުމާއި އޭނާގެ މައްޗަށް ނަޢަމުސޫފިތައް ލަޢުނަތްދިނުމާއި ނިކަމެތިކަން އޭނާގެ މައްޗަށް ވެރިވެގަތުމާއި ހިތުގައި ސިއްކަޖެހި ﷲ ތަޢާލާގެ ލަޢުނަތް ޙައްޤުވުމާއި ދުޢާ އިޖާބަނުވުމާއި ބިމާއި ކަނޑު ފަސާދަވުމާއި ޣީރަތްތެރިކަން ނެތިދިޔުމާއި ލަދުވެތިކަން ކުޑަވުމާއި ނިޢުމަތްތައް ބީވެގެން ދިޔުމާއި ޢުޤޫބާތް ޙައްޤުވުމާއި ހިތްބިރުގަތުމާއި ޝައިޠާނާގެ ދަންތުރައިގައިޖެހުމާއި ނިމުން ނުބައިވުން އަދި އާޚިރަތުގައި ޢަޛާބު ލިބުން” ހިމެނެއެވެ.
އެހެންކަމުން ފާފަތަކާއި ދުރުހެލިވެ، މި ފަނާވަނިވި ދުނިޔޭގެ މައްޗަށް އާޚިރަތް އިސްކުރުމަކީ ބުއްދިވެރިންގެ ގޮތެވެ. ދުޢާއަކީ ﷲ ތަޢާލާ، އަޅަމެންނީ ފާފަތަކުން ދުރުހެލިވެގެންވާ، ތަޤުވާވެރި ޞާލިޙު ބައެއްކަމުގައި ލެއްވުމެވެ!