ޖަމްޢިއްޔަތުއްސަލަފްގެ ފަރާތުން ރާއްޖޭގެ އެކި ރަށްތަކުގައި ދީނީ ހޭލުންތެރިކަން ފެތުރުމުގެ ގޮތުން ކުރިއަށް ގެންދާ “ހަފްތާ ބަންދު ދަރުސް” ޕްރޮގްރާމްގެ ތެރެއިން މިރޭ ށ. ފޯކައިދޫގައި “ފުރުޞަތު” ގެ ނަމުގައި ޚާއްޞަ ދަރުހެއް ބޭއްވުމަށް ވަނީ ހަމަޖެހިފައެވެ. މި ދަރުސް ދެއްވާނީ ޖަމްޢިއްޔާގެ ޢިލްމުވެރިންގެ މަޖިލީހުގެ ރައީސް އައްޝައިޚް އަޙްމަދު ސަމީރެވެ.
މި ދަރުހަކީ ރަމަޟާންމަހަށް ތައްޔާރުވެ، އެ މާތް މަތިވެރި މަހަށް އިސްތިޤުބާލުކުރުމުގެ ގޮތުން ބާއްވާ ޚާއްޞަ ދަރުހެކެވެ. މި ދަރުސް ބޭއްވުމަށް ހަމަޖެހިފައިވަނީ 14 ފެބްރުއަރީ 2025 ވާ ހުކުރު ދުވަހު (މިރޭ) 20:30 ގައި ށ. ފޯކައިދޫ ފުޓްބޯޅަ ދަނޑުގެ ހުޅަނގުފަރާތު ހުސްބިމުގައެވެ.
މި ޚާއްޞަ ދަރުހުގައި ބައިވެރިވާ އަޚުންނާއި އުޚުތުންގެ މެދުގައި ނެގޭ ގުރުއަތުން ހޮވޭ ފަރާތަކަށް ޢުމްރާ ދަތުރެއް ދޭގޮތަށް ވަނީ ހަމަޖެހިފައެވެ. އަދި މީގެ އިތުރުން ގުރުއަތުން ހޮވޭ އިތުރު 10 ފަރާތަކަށް އަގުހުރި އިނާމުތަކެއް ދޭގޮތަށް ވަނީ ހަމަޖެހިފައެވެ.
މި ދަރުސް ކުރިއަށް ގެންދަނީ މި ޖަމްޢިއްޔާއާއި، ފޯކައިދޫގެ ރަށު ކައުންސިލާއި ޕޮލިސް ސްޓޭޝަނާއި، ފެނަކައާއި، ސްކޫލާއި، ހެލްތު ސެންޓަރާއި، ޑަބްލިޔުޑީސީ، ބްލަޑް ބްރަދަރސް ޖަމްޢިއްޔާއާއި ދާރިސް ޓީވީ ގުޅިގެންނެވެ. މި ދަރުސް ދާރިސް ޓީވީން ލައިވްކުރާގޮތަށް ވަނީ ހަމަޖެހިފައެވެ. މި ދަރުހަކީ ރަމަޟާންމަހަށް މަރުޙަބާ ކިޔުމުގެ ގޮތުން އެ ރަށުގައި ކޮންމެ އަހަރަކުވެސް ބާއްވަމުން އަންނަ ދަރުސް ޕްރަގުރާމެކެވެ. މިއީ މިގޮތުން މި ޕްރޮގްރާމް ބާއްވާތާ 3 ވަނަ އަހަރެވެ.
ފޯކައިދޫގެ އިތުރުން ޖަމްޢިއްޔަތުއްސަލަފްގެ “ހަފްތާ ބަންދު ދަރުސް” ޕްރޮގްރާމްގެ ދަށުން މި ހަފްތާ ބަންދުގައި ށ. ނޫމަރާ، ށ. މިލަންދޫ، ކ. ގާފަރު، ކ. ކާށިދޫގެ އިތުރުން ތ. އަތޮޅުގެ އެކި ރަށްތަކުގައި ދަރުސްތައް ކުރިއަށް ދާނެއެވެ. މި ދަރުސްތައް ކުރިއަށް ގެންދަވަނީ އައްޝައިޚް ޢަބްދުއްސަލާމް ދާވޫދު، އައްޝައިޚް މުޖުތަބާ ޙަމީދު، އައްޝައިޚް ޝިހާމް މުޙައްމަދު، އައްޝައިޚް އަޙްމަދު ފަޒާދުގެ އިތުރުން އައްޝައިޚް ޢަޠީފު އަބޫބަކުރެވެ. މާތް ﷲ މި ހުރިހާ ޝައިޚުންނަށާއި މި ޕްރޮގްރާމުތައް ރާވާ ހިންގުމުގައި ޙަރަކާތްތެރިވާ އެންމެހާ ފަރާތްތަކަށް ހެޔޮ ޖަޒާ ދެއްވާށިއެވެ!