އައްޝައިޚް އަޙްމަދު ސަމީރު، ރައީސް ޑރ. މުޙައްމަދު މުއިއްޒުއަށް ޝުކުރު އަދާކުރައްވައިފިއެވެ.
އައްޝައިޚް އަޙްމަދު ސަމީރު، ރައީސް ޑރ. މުޙައްމަދު މުއިއްޒުއަށް ޝުކުރު އަދާކުރައްވާފައިވަނީ އިސްލާމްދީނާ ޚިލާފުނުވާ ގޮތަށް ހެދުން އަޅާނަމަ ވަޒީފާ ދިނުމުގައި އެއްވެސް ތަފާތެއް ކޮށްގެން ނުވާނެކަމަށާއި މޫނު ބުރުގާ އަޅާ މީހުންނަށް ވަޒީފާ ނުލިބޭ އުސޫލެއް ނޫނީ ޤަވާއިދެއް އޮތްނަމަ، އެ ބަދަލު ކުރަންޖެހޭ ކަމަށް ރައީސް މިއަދު ވިދާޅުވުމާގުޅިގެންނެވެ.
ޖަމްޢިއްޔަތުއްސަލަފުގެ ޢިލްމުވެރިންގެ މަޖިލީހުގެ ރައީސް އައްޝައިޚް އަޙްމަދު ސަމީރު، ޑރ. މުހައްމަދު މުއިއްޒުއަށް ޝުކުރު އަދާކުރައްވައި މިއަދު ކުރެއްވި ‘އެކްސް’ ޕޯސްޓުގައި ވިދާޅުވެފައިވަނީ މޫނުބުރުގާގެ ހައްގަކީ އެކިގޮތްތަށް މާނަކުރެވޭ ޤަވާޢިދެއްގައި ފިތި، ސިޔާސީދާނުން އެކިމޫސުމުގައި ބޭނުންކުރާ ހަތިޔާރަކަަށް ހަދާފައި އޮތް އޮތުން ނިމުމަކަށް ގެންނަވައި އެކަނބަލުންނަށް ދާއިމީ ޙައްލެއް ހޯއްދަވައި ދެއްވުމަށް ނިންމެވި ނިންމެވުމަށް ނިހާޔަތަށް ޝުކުރު އަދާކުރަވާ ކަމަށެވެ.
މޫނު ބުރުގާ އަޅައިގެން ސަރުކާރުގެ އެކިއެކި ވަޒީފާތަކަށް ދިއުމުގެ އިތުރުން، ސްކޫލުތަކުގައި ކިޔަވައިދިނުމާއި ކިޔަވަން ދިއުމުގައި ބޮޑެތި ހުރަސްތަކެއް ފާއިތުވީ ހުރިހާ ސަރުކާރުތަކަކުންވެސްވަނީ ކުރިމަތިކޮށްފައެވެ. އަދި މޫނު ބުރުގާއާ ދެކޮޅަށް ބޮޑެތި ޤަވާޢިދުތަކެއް މީގެ ކުރިން ހަދާފައިވެއެވެ.