إنا لله وإنا إليه راجعون !
ރާއްޖޭގެ މަޝްހޫރު ޢިލްމުވެރިންގެ ތެރޭގައި ހިމެނިވަޑައިގަންނަވާ فضيلة الشيخ آدم نسيم ( ބީ.އޭ ނަސީމް ) މިއަދު 18 ސެޕްޓެމްބަރ 2022 މ ( 22 صفر 1444 ހ ) ގެ ފަޖުރުގެ ވަގުތު ވަނީ މި ފަނާވެދަނިވި ދުނިޔެއާ ވަކިވެފައެވެ. ނަސީމަކީ މަދީނާ ޔުނިވަރސިޓީއިން ކިޔަވުން ޙާޞިލްކުރެއްވި އެންމެ ކުރީގެ ދިވެހި ދަރިވަރުންގެ ތެރޭގައި ހިމެނިވަޑައިގަންނަވާ ބޭފުޅެކެވެ. އިނގިރޭސިބަހުން އެންމެ ފުރަތަމަ ބީއޭ ފާސް ނެންގެވި ދިވެހި ދަރިޔަކީވެސް އެބޭފުޅާއެވެ. ދީންކިޔަވައިގެން ވަޑައިގެން ޤުރްއާނާ ސުންނަތުގެ ދަޢުވަތު ފެތުރެއްވުމުގައި ތަޤްރީރު ކުރެއްވުމާ، ލިޔުއްވުމާއި، ޅެންބަހުރުވައިންވެސް ވަރަށް ގިނަ ޚިދުމަތްތައް ދިވެހިރާއްޖެއަށް ކޮށްދެއްވާފައިވެއެވެ. އަދި ދީނީހޭލުންތެރިކުރުމުގެ މައިދާނުގައި ތަފާތު ގިނަގުނަ އުދަނގޫތަކާ، މުޞީބާތްތައް ތަޙައްމަލްކުރައްވާ،އެކިފަހަރުމަތިން ހުރަގޭގެ އަނިޔާވެރިކަންވެސް ޝޭޚް ނަސީމް ވަނީ ތަޙައްމަލުކުރައްވާފައެވެ. ޖަމްޢިއްޔަތުއްސަލަފްއާ އަބަދުވެސް ޚާއްޞަ ގާތްކަމެއް ބާއްވަވާ،ޖަމްއިއްޔާއިން ކުރިއަށްގެންދާ ދަޢުވަތުގެ އެކިއެކި ޙަރަކާތްތަކުގައި ބައިވެރިވެލައްވާ،އަދި އަމިއްލަފުޅަށް އެދިލައްވައިގެންވެސް ސަލަފްގެ ޕްރޮގްރާމްތަކުގައި ބައިވެރިވެވަޑައިގަންނަވަން އަބަދުވެސް މަސައްކަތްކުރައްވަމުންގެންދެވި ޝައިޚް ވަރުބަލިފުޅުކަމެއްނެތި، ޢިލްމީ އަދި ޢަމަލީ ޙަޔާތެއް ވެއަތުކުރައްވަމުންގެންދަވަނިކޮށް ކޮރޯނާގެ އާލާސްކަންފުޅުޖެހިވަޑައިގެން ހެލިފެލިވެއުޅުއްވުމުން ދުރުވެވަޑައިގެން އޮންނެވުމަށް ޖެހިވަޑައިގަތެވެ. އާލާސްކަންފުޅުގައި ދުވަސްތަކެއް ވެއަތުކުރައްވުމަށްފަހު މިއަދު އެވަނީ އަޅުގަނޑުމެންނާ އަލްވަދާޢު ކިޔުއްވާފައެވެ. ޝޭޚް ނިޔާވެގެންދިއުމީ ދިވެހިއުއްމަތުން ގެއްލިގެންދިޔަ ޢިލްމީ،ޢަމަލީ މަތިވެރި ޟަޚްޞިއްޔަތެއްގެއްލިގެންދިއުމެވެ އަޅުގަނޑުމެންގެ ދުޢާ އަކީ ޝައިޚްއަށް ފިރުދައުސްގެ މަތިވެރި ނިޢުމަތް މާތް ﷲ ދެއްވުމެވެ. އަދި ޢާއިލާއަށް ކެތްތެރިކަން މިންވަރުކުރެއްވުމެވެ.
